Your Content Here
اليوم الجمعة 19 ديسمبر 2014 - 2:08 صباحًا
أخر تحديث : الإثنين 25 فبراير 2013 - 2:18 صباحًا

Tixnderrisin n Saɛid g udrar n Sidi Σabid

أسماء أوطاح :

Taxnderrist wis 5

ɛ/ Σ = ع

X = خ

C = ش

ḥ = ح

Gh= غ

Q = ق

ṭ = ط

ḍ = ض

ṣ = ص

lt=tc

Ll=dj

Saɛid d aḥenjir d ameẓyan isseɛda tudert-ins g uḥsi n udrar n Sidi Ɛabid. Zeggwami d- ilul, yufa adrar zdat n tiṭṭawin-ins, ittlagha yas d ad gs iwddar, ad gs issen tudert, ad gs ilmed targazt. Cḥal ma nnan as yemmas d babas, alaghi n udrar n Sidi Ɛabid yujar marra min d as qqarn.

Aḥtac

“Tiskrin ttḥrurudnt, ttmrurudnt, a ughzar ad ccnt ad swent..”

  • Saiɛd, Saɛid, Saɛid,……..

“Ict tqqar a ɛmmi qa ntnint ffudnt, wi iḥadan ikks fus”

  • Kkr ssin ad tkkr dgk, tfuyt d azir, ck ɛad ttarjid

“Ayyaw mana yemma ya, ci n ddunnit ila lligh dgs, ila tṣar d gs ur tkkis fus…”,  iggemgm Saɛid uka ikkar.

Yufa  ict n txincit a twwurt n uxxam.

- Manaya a yemma?

- Raḥ awi d armas zg lmwi, imcumn iqnnay ur ufin magha ccn, farfra txxla angh gi tenɛacin a yelli

Saɛid ittmetta xmi d as tqqar yemmas a yelli, maca ur izemmar ad as yini ci.

- ad raḥgh ad ḥtcegh zg udrar a yemma ḥsn qa iccur s arbiɛ.

- Maca qa ɛad ad din raḥnt suytmak ?

- Ini asnt ur illi mimmi i gha raḥnt, ad raḥgh nnit.

- Iwa raḥ waha mani ma traḥd zid. Uka ad as inigh i babak ad iqddm armas akids.

- Rux, maca ɛad ur ccigh

- Iwa zid ad tccd ad raḥgh ad ak d awigh taḥtirt.

Ikka gi Butqabut yuri s wulli ins, tikarmin as Faḍma n Σmar. Adrar isrulli s iwdan ɛawd. Ha wnn irssen, ha wn iḥettcn, ha wn ittsumurn gi tfuyt.

Irzu din Saɛid x imeddukal ins, ur yufi ḥdd. Maca ntta ur d yuri a udrar x imeddukal. Yusi d x ḥdd nneghni.

Iẓra tiḥimriwin n twetmin ḥttcent, astiqa ttggnt twiza x uḥtac.  Immernu gharsent, walu ur din yufi tnni mix irzzu, yugur.  Ittsla asent ḍeḥḥkent, izwegh, ila ɛlayn ibedda as wul.

Isniɛmir  iḥttec, ntta ittsla: wnni d burṣṣuḍ a Saɛid, min ttgged?

Imrulli yufa d Lwiza, isfirnen zg umeẓẓugh a umẓẓugh, ɛawd izwegh, iffgh as d ci ittawi d dg wawal:

  • Man, magh?

  • Yak burṣṣuḍ ur t tetten iqnnay!

  • Nc ma ssngh.

  • I immi d tusid ad tḥtced umi ur tssind

Innbkem Saɛid, ur yufi min d as gha yini, ɛawd izwegh.  Ruxa d nettat ig isfirnnen.

  • Zid zdat i ad ak mmlegh min ttetten zid.

Uka kkan d adrar ammn ikmel,  ttkksn arbiɛ. Lwiza tmmal as: ha tmannaḍt, ha tghighct, ha taddadin, ha insli, ha tagzint talqqaght, ha imzwar,…

“Cḥal tssn tmcunt a!”, iqqar ag ixf ins.

Gan amsizwr x wn gha iccarn txincit. Tzwar as Lwiza. Timsna n isggwusa ur tlli am ten n ijj n was. Maca Saɛid ur t id icqi ci.

Ccurn tixuncay uka qqimn ad skutan x ict n tẓrut.

Innas: Lwiza, ad nɛyar tiskrin tḥrurudnt.

Tnna as: waxxa, maca aqa negh gi tnayn waha.

Inna as: maɛlic, ad nlha waha.

Uka bdan,  Lwiza attaf ɛad aqa tt gi “a ughzar ad ccnt ad swnt”, Saɛid attaf iwweḍ a “wi ḥadan ikks fus”. Maca Lwiza, tefsus, dghya ttkkes fus. Xlli ammen, Saɛid yuka ag ixf ins amknaw iṭtaw.

Ittwala imeddukar ins ttarin d, ikkr, iksi txincit, iraḥ ad ten ilqa, zdat ma ad t id ẓren.

Umi yewwḍ a taddat, iciyyɛ txinct zi twwurt idwl a udrar, arbiɛ ci iṣar a dixl, ci iṣar brra: ha tmannaḍt, ha tghighct,…

أوسمة :

اتـرك تـعـلـيـق 0 تـعـلـيـقـات

الرجاء من السادة القراء ومتصفحي موقع الريف الحر الإلتزام بفضيلة الحوار وآداب وقواعد النقاش عند كتابة ردودهم وتعليقاتهم، وتجنب الشخصنة و إستعمال الكلمات النابية وتلك الخادشة للحياء أو المحطة للكرامة الإنسانية، فكيفما كان الخلاف في الرأي يجب أن يسود الإحترام بين الجميع . ونحيطكم علما أن جميع التعليقات المنشورة في الموقع تعبر عن رأي أصحابها وليس للموقع أي مسؤولية إعلامية أو أدبية أو قانونية عليها، ولا يتحمل مسؤولية ما يُنشر نقلًا عن مواقع أخرى أو بركن آراء حرة.